Contribuziuns finanzialas dalla vischnaunca e revisiun taxas el Reglament per diever da stabiliments communals per la vischnaunca Lumnezia (217.110).
La vischnaunca Lumnezia sustegn uniuns e gruppaziuns d’interess cun contribuziuns finanzialas. Dad ina vart ein quei per uniuns indigenas las contribuziuns pauschalas annualas, da l'autra vart sustegns individuals per projects ed occurrenzas.
Damondas per contribuziuns san vegnir inoltradas mintgamai sils 15 da mars, ils 15 da zercladur, ils 15 settember ed ils 15 da december. Las damondas vegnan tractadas mo sch'ellas entran tier l'administraziun communala ad uras enteifer quei termin. Autramein vegn la decisiun stuschada sil proxim quartal.
Tut tenor grondezia dil project, eis ei d'inoltrar in concept, in preventiv da project ed in plan da finanziaziun. Occurrenzas ni projects ch'ein planisai a liunga vesta dueien vegnir inoltrai ad uras per preexaminaziun, era sche la planisaziun ei aunc buca serrada giu. Quei duei simplificar il process da preparaziun pil preventiv, ton per las uniuns sco era per la vischnaunca Lumnezia.
Damondas da contribuziuns ein d'inoltrar en scret per posta ni posta electronica: Vischnaunca Lumnezia, cumissiun da cultura, Palius 32D, 7144 Vella ni info@lumnezia.ch cugl avis "cumissiun da cultura". Damondas directamein tier commembers dalla suprastonza communala vegnan visadas anavos.
Reservaziuns da localitads e publicaziuns per occurrenzas
Reservaziuns da localitads san vegnir fatgas sur la pagina d'internet dalla vischnaunca: https://www.lumnezia.ch/rm/spurtegl-virtual/reservaziun-localitads.
Leu anfleis Vus era ulteriuras informaziuns, per exempel davart damondas per lubientscha d'ustria ed auter.
Occurrenzas che Vus annunzieis alla vischnaunca cul formular https://www.lumnezia.ch/rm/form/create-events vegnan era dadas vinavon alla Surselva Tourismus AG per publicaziun sin lur pagina. Publicaziuns el Fegl ufficial dalla Surselva ein caussa dils organisaturs.
Taxas per diever da localitads
Las taxas per diever da localitads ein d'anflar ell'annexa tier il Reglament per diever da stabiliments communals per la vischnaunca Lumnezia (217.110).
La suprastonza communala ha approbau la revisiun dallas taxas, las qualas vegnan applicadas naven dad immediat.
Ils reglaments dalla vischnaunca Lumnezia ein accessibels sut https://www.lumnezia.ch/rm/spurtegl-virtual/legislaziun.